Sön i fostüs dla laûrs preistorica

Devertimënt por mituns dai 5 ai 12 agn

Domisdé por mituns danter i 5 y i 12 agn cun vijita al Museum Ladin Ursus ladinicus, face painting y ativitês da pastelnè.
En colaboraziun cun l'Assoziaziun Turistica dl'Alta Badia.

Termins

vigni mercui dai 08.07 ai 31.08.2020 (cun ezeziun dl 22.07 y dl 12 y 19.08)

dales 17.00 ales 18.30

Prisc

5 Euro por porsona

Prenotaziun

Ofize Turistich S. Ciascian
Tel. 0471 849422

Invit ales scores por tó pert a n de de ativités didatiches tl Museum Ladin

Stimá Direturs y Maestri,

al é cun gran ligrëza che le Museum Ladin inviëia ite osta scora a tó pert ales nostes ativités didatiches. Chiló dessot vëgnel dé dant les propostes dles ativités didatiches desvalies pitades dant dal Museum Ladin por passé adöm n de de formaziun y de devertimënt. Le museum pita sides n'ativité tl danmisdé co tl domisdé por ti gní adincuntra ales scores che vëgn adalerch da plü da dalunc o grupes che se dejidrass da se archité sö plü dî.

Proposta 1 - "Ala descurida dla laurs di andri y n spazier naturalistich"

Le percurs mët man cun la vijita a le Museum Ladin Ursus ladinicus a San Ciascian dales 10.30 ales 12.00. Le museum trata les tematiches dla laurs de Conturines, Ursus ladinicus, che viô tles Dolomites zirca dan da 40.000 agn, y dla geologia dles Dolomites. Tres chësta vijita röia i studënc, te na maniera scëmpla y intuitiva, a na conoscënza plü sota dles carateristiches fisiches y comportamentales de chësta grandiscima laurs y dles condiziuns climatiches te chëres che ara viô. Dër interessanta é la poscibilité da podëi paridlé la fisionomia dla laurs di andri cun chëra de n beliscimo ejemplar imbalsamé de laurs rossa, sort de laurs che vir ciamó aldedaincö. La vijita jará inant do marëna dales 14.00 ales 16.00 zirca, sön n tru naturalistich: le tru di artisć, danter bosć, pra y operes d'ert. Le tru é saurí y vá tl plat. Al é le post adaté por scolari plü o manco pici por imparé da aprijé la natöra y l'ert.

Proposta 2 - "Ciacia al Tesur tl Museum Ladin Ćiastel de Tor y vijita ala Val di Morins"

La vijita mët man da doman dales 10.30 tl Museum Ladin Ćiastel de Tor. Le museum tëgn sö y nes cunta la storia, le lingaz, la cultura, les liandes, l'archeologia, la geologia y l'artejanët dla popolaziun ladina. Por se devertí y imparé insciö damí él l'ativité didatica che vëiga dant na "Ciacia al tesur tl Museum Ladin". Pro la ciacia al tesur vëgn i studënc partis sö te grups da 6 y pó vijité le museum da susc. So compit é da se conscidré jö plü avisa val' esponat messon dopo spo se recordé olache val' un de chisc "tesurs" é da ciafé y ester bogn da i scrí sö sön na picia planta dl museum. Tres chësc jüch él i studënc che alenëia la memoria, impara da laoré adöm danter ëi y svilupëia na maiú sensibilité por l'osservaziun di esponac di museums. Tl domisdé, do marëna, le musem pita dant n'escurjiun te n paesaje incanté che recorda la vita da zacan: la Val di Morins. Tla Val di Morins, olache les carateristiches dla natöra dolomitica y la cultura de chisc posć é dassënn liades adöm, pón vijité ot morins renová daldöt.

Proposta 3 - "Ala descurida dles Dolomites y vijita ala Val di Morins"

Le Museum Ladin pita na beliscima odüda panoramica sön le paesaje dolomitich. Danmisdé jarán plü sot tles particolarites geologiches de chëstes munts. Cun corëc vedli cënc de miliuns de agn, peres y pici esperimënc ciafa la fantasia di studënc fle y l'ativité fata plü interesanta. La conesciun danter paesaje y cultura é dër sterscia, porchël, por stlüje jö chësta jita tl paesaje dolomitich, jarán tl domisdé a vijité la Val di Morins olache an podará fá n salt tla vita da zacan.

Sce al ess da plovëi

Sce al ess da plovëi gnarál dötes les ativités didatiches fates a d'assosta ti museums. Danmisdé gnarál insciö pitada dant la vijita al Museum Ladin Uraus ladinicus a San Ciascian y domisdé la Ciacia al Tesur tl Museum Ladin Ćiastel de Tor a San Martin de Tor.

Orars, prisc y informaziuns generales

Domandes y ciacia al tesur

Le Museum Ladin pita l'oportunité da fá na vijita virtuala tres les döes sëntes dl museum, chëra dl Ciastel de Tor y chëra dl Ursus ladinicus. Lapró á le museum arjigné ca domandes por ves acompagné tres i salamënc di museums fora. Chësc él sambëgn les scores che pó adoré por sü studënc, mo ince les families por passé dl tëmp a descurí la cultura ladina y i contignüs dl museum. Chësta ativité é gnüda partida ite te döes perts: öna che vá plü ite ti contignüs dl museum, plü adatada a mituns dles scores mesanes, y öna n pü' plü sciampla strotorada sciöche na ciacia al tesur. An pó ciafé les domandes y la descriziun dl'ativité ti links chiló dessot. L'azes ala vijita virtuala ciafon indere tl trapez blanch sot al menü tla pröma plata dla plata internet dl museum (www.museumladin.it).

Domandes vijita virtuala Museum Ladin

Domandes ciacia al tesur virtuala Museum Ladin

Por ciafé les soluziuns di formulars y plü informaziuns sura l'ativité pón cherdé sö le Museum Ladin Ciastel de Tor al numer 0474 524020 o scrí ala misciun eletronica info@museumladin.it

Conësceste Ander? - Kennst du Ander? - Conosci Ander?

Al nes fajess plajëi da odëi ostes costruziuns, porchël, sce orëis, podëis nes mené val' foto ala misciun eletronica dl museum info@museumladin.it. Cun osta aprovaziun fossun spo contënc da podëi publiche sön i canai social dl museum valgügn de üsc laurs.

Drüca chiló: Istruziuns y material

-------------------------------------------------------------------------------------------------------------------------------------------------------------------------------------------------

Conësceste Moltina? - Kennst du Moltina? - Conosci Moltina?

Al nes fajess plajëi da odëi ostes costruziuns, porchël, sce orëis, podëis nes mené val' foto ala misciun eletronica dl museum info@museumladin.it. Cun osta aprovaziun fossun spo contënc da podëi publiche sön i canai social dl museum valgügn de üsc laurs.

Istruziuns, material y storia

Film animé: Moltina

Grafica y film animé: Museum Ladin y MarameoLab