Novités
Concurs Trienala Ladina 2019 Concurs Richard Agreiter, cumpra de na scultöra
Chisc dis á le Museum Ladin Ciastel de Tor iscrit fora i concursc Trienala Ladina y Richard Agreiter. Les iscriziuns po gni fates por i 15 de merz 2019
Concurs Trienala Ladina 2019
La Trienala Ladina 2019 á sciöche fin chël da valorisé y sostigní l’ativité artistica ti raiuns ladins ti pitan l’oportunité ai artisc y ales artistes da se fá conësce a n publich ampl y a esperc dla critica artistica. Por le sesto iade él le Museum Ladin Ciastel de Tor che mët insciö da jí la „kermesse artistica“ plü aspetada tles valades ladines che sará da odëi dai 20 de stëmber 2019 cina ai 24 de má dl 2020 diretamënter tl Museum Ladin a San Martin de Tor.
Tó pert al concurs artistich pó düc i artisc y les artistes dles valades ladines dles Dolomites (Val Badia, Gherdëna, Fodom, Fascia y Ampëz) dai Grijuns y dal Friul. To pert pó ince i artisc che á n lian particolar cun la cultura y la storia ladina. Dötes les formes de ert é ametüdes: dala pitöra ala scoltöra, istalaziuns, fotografies, video y insciö inant.
Concurs Richard Agreiter - cumpra de na scultöra
L’Museum Ladin Ciastel de Tor, en colaboraziun cun l’artist Richard Agreiter, scrí ince fora n concurs por cumpré jö scultöres d’ert. Al concurs po to pert. artisc de scoltöra che laora y é aciasá tl raiun dl Tirol storich, damí dit, che vëgn dal Euregio Tirol – Südtirol – Trentino y dai trëi comuns ladins dla provinzia de Belun y che á n lian particolar cun la cultura, la storia y les tradiziuns de chisc raiuns. L’opera o les operes chirides fora dala iuria gnará cumprades jö dal Museum Ladin.
Por tó pert ai concursc él nezesciar dé jö la candidatöra anter y nia plü tert co ai 15 de merz dl 2019 dales 12.00. La documentaziun pó ince gní menada ite tres email, dada jö personalmënter o ince menada por posta. Da mëte averda: la data dl timber dla posta ne vel nia.
La verjiun integrala dla bandida di concursc cun düc i detais che reverda la documentaziun damanada é da ciafé chiló injuntá
Por plü informaziuns: Museum Ladin Ciastel de Tor, strada Tor 65, San Martin de Tor, tel. 0474/524020
|
Museum Ladin Ciastel de Tor Str. Tor 65, I-39030 San Martin de Tor Tel. +39 0474 524020 E-Mail info@museumladin.it Web www.museumladin.it Facebook www.facebook.com/Museum Ladin |