Novitês

Ai 28/10/2007 dales 14.00 tl Museum Ladin presentaziun dl liber scrit da Daria Valentin "La vita sciöche n jüch"

La vita sciöche n jüch
La vita sciöche n jüch

L a  v i t a  s c i ö c h e  n  j ü c h

Tan de iadi adorunse pa nos la parora jüch o s´oghé tla conversaziun da vigni dé? Le jüch vëgn adorè ti contesc´ y aspec´ plü desvalis: por reflesciuns pedagogiches, al vëgn adorè dé por dé dai mituns por miorè so svilup motorich y cognitif, al vëgn tut ca da jogn o gragn por passè sovënz de bi momënc´ en compagnia. Pian ia dala constataziun che inc´e i jüc´ é n aspet important dla cultura ladina à le Museum Ladin “C´iastel de Tor” dediché l’ann 2007 al tema dl jüch. Nia manc´é ne podô te chësc contest na inrescida che ti é gnüda surandada ala dot.a Daria Valentin, finalisada a inrescì do coche al gnô s´oghé tles generaziuns passades, coche cer’ jüc´ â inom tles valades desfarëntes y a sotrissé la importanza dl jüch dal punt de odüda sozio-cultural tla realté ladina.

Tles plates de chësc liber à l’auturia inrescì do y coiü adöm cun gran entusiasm y savëi tröpes informaziuns sön i jüc´ che gnô y che vëgn c´iamò

al dedaincö fac´ te nüsc raiuns: dai jüc´ alaleria a chi di gragn, dai jüc´ da mësa a chi de sozieté, dai jüc´ de tradiziun a chi de parores. Implü é la publicaziun gnüda arichida en cört da capitui cun argomënc´ che taca adöm al jüch sciöche le jüch tl’ert, le jüch tla musiga, le jüch tl sport y i jüc´che é gnüs publicà ti ultimi agn. Da cornisc a chësc liber ti fej le tröp material fotografich, en gran pert mai gnü publiché y les fotos, chirides adöm sura döta la Ladinia cun lezitënza y sensibilité, à le fin de testemonié visivamënter sciöche nüsc antenac´ se tripâ te so tëmp lëde.

La publicaziun dess gnì intenüda sciöche na sort de “enzitlopedia” di jüc´, na racoiüda de recorc´ che al ê gran ora da fà c´ina che al ê c´iamò meso damanè fora chës generaziuns de porsones che se tripâ cun mesi scialdi plü scëmpli de chi che le monn d’al dedaincö nes pîta.

Cun chësta inrescida unse orü da öna pert curì la gran loc´ia che ê c´iamò tla publizistica dla Ladinia en cunt dl tema dl jüch y dal’atra pert dè n spunt a esperc´ y apascionà por inrescì inant sön un o l’ater di tröc aspec´ che foss c´iamò da laurè fora y che interessëia le monn afascinënt dl jüch.

Le diretur dl Museum Ladin

Stefan Planker