Novitês

Gran ntres dl cumisser EU Orban per Museum y Scola ladina

USP – L Cumisser dl’Europa per l Plurilinguism Leonhard Orban à dedicà na bela pert dla vijita tla Provinzia de Bulsan ala Ladinia. N lunesc domesdì (15 juni) al pra la vijita tl Museum Ladin a San Martin de Tor mustrà gran nteres per la realtà ladina cun si sistem de scola paritetica.

EU Komissar Orban
EU Komissar Orban

“L capitea veramënter d’inrer de avëi n gest che vijitea l museum cun tan na gran atenzion y dedizion” à dit l presidënt dl Museum Ladin Heinrich Huber do la vijita dl Cumisser. Cumpanià dal assessëur Florian Mussner ie Orban unì menà tres l Museum ladin dal diretëur Stefan Planker. Si gran nteres per la ravises dla grupa de rujeneda ladina cun si tradizions y usanzes à fat gran plajëi al’autoriteis prejëntes. Te si salut à l presidënt Huber prejentà la Ladinia che te passa 2000 ani a daniëura vissu tl medemo raion. “I Ladins se à mpenià per si vester, si arpejon culturela y si rujeneda, la se merita nsci nce l dërt de unì scuteda su” à dit Huber. Che la populazion tën do si grupa de rujeneda ala desmustrà pra uni cënsimënt che ie unì fat. L assessëur Florian Mussner à purtà dant la situazion politica y argumënc che ti stà a cuer ala grupa de rujeneda. “L fej plajëi che l cumisser crëia tan tla mendranzes, nce sce tl’Europa ne ie plu degun popul maiuranza n cont de cultura y rujeneda perchël sons duc mendranza” à dit Mussner.
Do la ntroduzion ala scola ladina cun si sistem paritetich da pert dl ntendënt Roland Verra, à Orban for inò damandà do custions spezifiches. Nsci ti iel unì prejentà n particuler l sistem scolastich, la situazion atuela y co che vën fai i ejams tla scoles ladines.

(as)