Novités
Cuncorsc artistics metui a jì dal Museum Ladin per l 2010
Bele dan sies ani ova l Museum Ladin Ciastel de Tor metù a jì si prima Trienala Ladina, manifestazion d’ert penseda per i artisc’ Ladins. Pra la Trienala uniral metù su na cumiscion de livel internaziunel che dëssa valuté i curricula di candidac. I 5 miëures puderà mëter ora ti salamënc dl Museum Ladin te na mostra.
Coche dan trëi ani iel nce chëst’ann preudù n segondo cuncors dal Titul “Pest artistich Richard Agreiter”, n pest de bën 10.000,00 Euro. Tl 2007 ova venciù ex aequo Gehard Demetz y Hubert Kostner. Chësc pest ti unirà dat a chël artist o artista che la cumuscion rata che se merite l plu.
Pra la terza edizion dla “Trienala Ladina” puderà fé pea duc i artisc’ Ladins dla valedes ladines, ma nce i artisc’ y artistes di Grijons y dl Friul; pra l cuncors per l “Pest artistic Richard Agreiter” puderàl se candidé duc i scultëures dl Tirol storich chël uel di artisc’ dla cin valedes ladines dla Dolomites, dl Trentin, dl Nord y Osttirol y de Südtirol.
L regulamënc di doi cuncorsc unirà fac al savëi te na cunferënza stampa ai 10 de fauré 2010 dala 10.00 danmesdì tl Palais Widmann a Bulsan.
Do chësta data inant uniral publicà i doi regulamënc nce tla plates internet dl Museum Ladin. Nfurmazions plu avisa giata i nteressei cherdan su l Museum Ladin Ciastel de Tor a san Martin de Tor sota l numer 0474 524020.