Novités
Ai 30 de aurí inauguraziun dla mostra „la fotografia por comuniché...“
En ocajiun di 15 agn dala fondaziun dl Fotoclub Val Badia, metü sö impröma sciöche seziun dla Uniun di Ladins, y dal 2000 incà sciöche uniun autonóma, vëgnel tignì tl Museum Ladin Ćiastel de Tor na mostra coletiva dal titul
"la fotografia por comuniché...“
18 fotografs scrić ite al Fotoclub presentëia retrać de natöra, contrades, tiers y porsones da chilò, mo inće de d’atres perts dl monn.
Düć é dër bel invià ala daurida dla mostra che vëgn inaugurada tl Museum Ladin a San Martin ai 30 d’aurì 2010 dales 18.00 y sarà da odëi ćina ai 11 de messè.
Te chësc tëmp gnaràl inće lascè odëi trëi multivijiuns, plü avisa
1. ai 10 de mà,
2. ai 10 de jügn
3. ai 1. de messè
dagnora tla sënta dl Museum, dales 21.00.
1. La pröma sarà chëra dl fotograf conesciü Alfred Erardi da La Val dal titul „Natöra, munts, löm“;
2. Pro la secunda saràl Paul Erlacher d’Al Plan che mostra na ligna de retrać dal titul „La natöra y sü 4 elemënć“;
3. Tla terza vijiun sarál Helmut Elzenbaumer da La Val che mostrarà süa composiziun de fotografies „Vijiuns tla natöra“.
Interessant por düć chi che à ligrëza da fà jö y che ó imparè y savëi val’ deplü, é dessigü inće le
Dè d’informaziun sura la fotografia (workshop)“
che vëgn tignì en
sabeda ai 5 de jügn tl Museum
N valgügn mëmbri dl Fotoclub sarà a desposiziun dales 14.00 ales 17.00 por chi che ó damanè o avëi val’ informaziun sura la fotografia y le fà jö.