Novitês

Tröpa jënt al Museum Ladin por l'Dé dla porta daverta

500 vijitadus é gnüs adalerch por ti ciaré al museum y por to pert ai workshop desvalis

Cun les plantes vara ince da fa sonns
Cun les plantes vara ince da fa sonns
Paolo Vinati cun i pici vijitadus

Dé Internazional di Museums tl Museum Ladin Ćiastel de Tor a San Martin de Tor

Gran suzes de publich, en domenia ai 16 de mà por l’Dé Internazional di Museums, sot al titul “Museum y armonia de onns tla sozieté”

Sciöche vigne ann, à inće staota l’Museum Ladin Ćiastel de Tor indô tut sö l’invit da pert dl’ICOM (Consëi Internazional di Museums) da tó pert al Dé Internazional di Museums. L’programm interessant à trat adalerch en gröm de families, nia ma dles valades ladines, mo inće da fora de cà. An à podü cumpedè feter 500 persones.

Sides i gragn che inće i pici porvâ dassënn, daidà da Oscar Moling da La Val y Fulvio Vian da Vich de Fascia da ziplé fora sciüri te deplü formes. Les rames de manëster y aunic é te chësc tëmp d’aisciöda ideales deache la linfa danter scorza y mane se lascia plü saurí destaché dala scorza. I mituns saltâ fora por i prà dlun sciuran cun süa picia “opera d’ert”. Tröć de gragn se recordâ canche ai fajô instësc i scüri sciöche passatëmp jon a vardé. I pici vijitadus rodâ cun Paolo Vinati fora tl vërt a chirí ciüfs de salata de pré/polentes  y erba por sciuré, cun chisc jora pö inće da fa de vigne sort de sonns.

Tla curt dl museum êle Max Castlunger che aspetâ I vijitadûs por mostré tan de poscibilitês che la natöra pita por fa sonns de vigne sort. Ćiases di sgneć, taies ötes, corn de tiers, plates di funć, züches y finamai n gramurin de müsc. Döt fej musiga.

Domisdé ia podô i interescià ascutè la presentaziun dl proiet inciaré al etnologh de musiga Paolo Vinati sura i “strumënć de cörta dorada” (strumenti effimeri) intitolé: “sciüre, scibloc e subiote”. Chësc proiet presentarunse proscimamënter tla Usc.

Chësc dé à dè la poscibilité da ponsé sura a ći che la natöra nes pita, tan de sonns y musiga, mo nos messun daurí nüsc edli y ciaré y nostes orëdles y ascuté..