Novitês

III. Trienala Ladina y 2. Pest artistich de scultura Richard Agreiter

L Museum Ladin Ciastel de Tor de San Martin à scrit ora per l ann 2010 bën doi cuncorsc artistichs. L se trata dl “Pest artistich de scultura Richard Agreiter”, che do l 2007 ie ruvà chëst’ann a si segonda edizion, y dla “Trienala Ladina” che ie urmëi ruveda a si terza edizion.

Premiazion "Pest artistich de scultura Richard Agreiter" 2007
Premiazion "Pest artistich de scultura Richard Agreiter" 2007

Ala III. Trienala Ladina possa tò pert i artisc dla 5 valedes ladines dolomitiches (Val Badia, Gherdëina, Val de Fascia, Fedom y Ampëz), dl Cianton di Grijons tla Svizera y dl Friul. La partezipazion al cuncors ie daviërta al’artistes y ai artisc ladins o nce a chëi che à n liam particuler cun la storia, la cultura y la tradizions ladines. L tema dla III Trienala Ladina se ispira al prinzip “Tl museum per comunichè…” y, plu n generel, mira la mostra a revalutè la criazion artistica ti raions numinei y a ti dè la puscibeltà ai artisc de se mustrè al mond dl’ert, ala critica y an publich plu grant. La Trienala Ladina se gëura a duc i jëndri artistiche.

I premiei dla III. Trienala Ladina

Ai 13 de merz à la cumiscion metuda adum da esperc y critics d’ert nternaziunei, numinà i artisc dla III. Trienala Ladina y nce l scultëur che à venciù l 2. Pest artistich de scultura Richard Agreiter. Di 36 artisc y artistes che à tëut pert ala III. Trienala Ladina, 33 ladins, 2 dl Friul y 1 di Grijons, iel unì crì ora chisc 6 inuemes.

Romana Prinoth de Sëlva, viv a Dispruch

Esther Schena, Cianton di Grijons (Svizera)

Barbara Tavella da La Val (Val Badia)

Veronica Zanoner da Moena (Val de Fascia)

Peter Demetz de Urtijëi (Gherdëina)

Claus Vittur da La Ila (Val Badia)

I artisc premiei muessa fè n lëur ispirà al tema “Tl museum, per comunichè…”. L’operes unirà metudes ora tl cuntest dla mostra culetiva III. Trienala Ladina, che giaurirà ai 23 de messel y jirà inant nchina ala fin de utober tl Museum Ladin Ciastel de Tor.

 

2. Pest artistich de scultura Richard Agreiter

Bën 53 ie i artisc (31 ladins, 12 sudtirolejes y 10 austriachs) che à fat pea pra l 2. Pest artistich de scultura Richard Agreiter. L Pest artistich de scultura Richard Agreiter ie daviërt a duc i artisc dl Tirol storich (Tirol dl Nord, Tirol dl Est y Südtirol, Trentino) y ai artisc dla valedes ladines de Badia, Gherdëina, Fascia, Fedom y Ampëz. L inuem dl scultëur che à venciù i 10.000 Euro dl cuncors y nce i cumëmbri dla giuria nternaziunela, unirà fac al savëi permò n ucajion dla giaurida dla mostra culetiva III. Trienala Ladina.

La giaurida dla mostra culetiva Trienala Ladina y la sëurandeda dl Pest artistich de scultura Richard Agreiter ie preududa per i 23 de messel 2010 dala 18.00 tl Museum Ladin Ciastel de Tor a San Martin.