Novitês

Kathrin Partelli à davagné l' 2. Pest artistich de scoltöra Richard Agreiter

L’opera lëdia formalmënter de Kathrin Partelli (1980), la davagnadëssa dl 2° Pest artistich de scoltöra Richard Agreiter, é na ciauriada cun i edli daverc, te chëra che la scoltöra se trasformëia te n meso da na forza y richëza daldöt particolara.

Kathrin Partelli davagnadëssa dl 2° Pest artistich Richard Agreiter
Kathrin Partelli davagnadëssa dl 2° Pest artistich Richard Agreiter

Kathrin Partelli

Nasciüda a Balsan tl 1980, vir y laôra a Balsan y a Minca.

Formaziun

1999-2001 Zënter por le laûr tl vider “Vetroricerca” a Balsan

2001-2003 Cursc y practicums desferënc ti Paisc Todësc y tla Talia

2003-2009 Stüde tla Academia d’Ert de Minca cun i Professurs Norbert Prangenberg y Hermann Pitz

2008-2010 Master cun le Professur Hermann Pitz

2010         Diplom

 

Mostres

2004-2009 Mostres anuales, Academia d’Ert Minca

2004         Polish your Image, Ćiasa dl artist Kempten, Kempten

Coleziun d’ert dles festes de Coburg

2005         Frangibile 02, Zënter cultural Trevi, Balsan

Istitut cultural talian, Prag2006

2006         Talënć 2006, IHM Minca

Mostra dla fundaziun Ernsting, Coesfeld-Lette

Concurs internazional de scultöra, Museum dl vider Mava, Madrid

2007         Vider d’artist, Palaz di Cungresc, Madonna di Campiglio

2008         European Glass Context, Glass Museum Ebeltoft, Ebeltoft/DEN

Pest d’ert Aichach, Aichach

2009         “Das wär’s gewesen”, Galaria dl’Academia, Minca

Iade tl univers di burocrać, salf da aspetè, Staziun zentrala Minca

DECAthlon mür cuntra mür, plataforma 3, Minca

2010         Studënć diplomà 2010, laurs desferënć, Galaria di artisć, Minca

 

Reconoscimënć y stipendiums de stüde

2006         Concurs internazional Talënć 2006, IHM Minca

Concurs internazional de scultöres tl vider Mava, Madrid

2009         Stipendium Stibet

 

Sce an ćiara en cört te sorëdl y stlüj i edli, spo resta n cheder te nosc će. Chësc che pê ester na ilujiun otica, n’é nia ater co n prozès fisiologich de contrast danter lominus y scür y l’imaja che vëgn a s’l dè sön la pel dla rëi dl edl. Ala medema manira resta te nosc će y te nosc pinsier inće n cheder de n’opera d’ert che i ùn odü te na mostra. Chësc cheder stlüj dal’atra pert inće ite na componënta psicologica, che se liëia sambëgn al interes dl vijitadù. Plü sterch che l’interes é y plu tler che al é le cheder che i se tolun para.L’ert de Kathrin Partelli descëda chësc interes. Sambëgn, al é tler che vignun se tol para valch de desfarënt dai laurs che al vëiga. Al é avisa sciöche canche an vëgn fora de n chino dlungia deplü porsones. Inće sce düć à odü ala medema manira chi feter 20 chedri al secunt tratan döta la dorada dl film, se tol impò vignun para valch de desfarënt. N valgugn chedri é gnüs suraodüs da düć, d’atri i é restà tl će ma a püć.Les operes d’ert lascia na merscia te chi che i ćiara, sides che ai dà al edl por süa löm co sce ai alza fora n contrast tla materialité. Te süa istalaziun Eigentlich, 2010 laora Kathrin Partelli cun le contrast di materiai, adorà tla mëndra forma. Tl confrunt cun d’atres operes d’ert similares arjunj so stil n gran contrast cualitatif. Al é da se fà morvëia tan che nes resta de sü laurs te nosc pinsier, inće sce i ti ùn ma ćiarè por tëmp cört y inće sce al é bel dî che i i ùn ćiarè.Te sü laurs vala inće dl punt zentral de tan püch material che al va debujëgn, por cherié n cheder o pinsier permanënt. Cun n’opera „püra“ de materiai trasmët Kathrin Partelli n messaje sterch y che se mantëgn tl tëmp. Dötes les atres conscideraziuns po y dess fà le vijitadù instës, avisa inće ti fajon onur al titul instës dla mostra, che é pö avisa „pordërt“, Eigentlich.

Hermann Pitz, Minca

 

 

Le laûr de Kathrin Partelli

Él n pisciadù che rogor bel morjel cuntra la flöm? O é chësta na lovina, che sbriscia cun na dërta prescia cuntra val? O él mo forsc n crëp, che sleria fora capaze sües mosöres tla contrada strinada? L’opera lëdia formalmënter de Kathrin Partelli (1980), la davagnadëssa dl 2° Pest Artistich de scoltöra Richard Agreiter, é na ciauriada cun i edli daverć, te chëra che la scoltöra se trasformëia te n meso da na forza y richëza daldöt particolara. Tres l’aziun delibrënta y emanzipatora dl ampliamënt dla lerch, trasformëia l’artista la scoltöra sciöche collage che tol ite de plü disciplines danter grafica spaziala, istalaziun y costruziun architetonica. “Eigentlich” é, sciöche le titul dij pordërt bele, le manifest de Partelli dla condiziun ontologica de süa opera. Pordërt nia definida plü avisa, descrîera n prozès, n momënt dl gnì dër śëgn definì y articolè, na condiziun permanënta dl gnì. Les strotöres instabiles y delicates dl’artista é creatöres organiches, volums ambulanć (“Le viandant” é por ejëmpl le titul de öna de sües scoltöres), che recorda da öna na pert proieć architetonics visionars y utopics di agn 1960 y dal’atra pert l’arpejun dl’ert minimala, o ćinamai dla tradiziun romantica dla grandëza tla rapresentaziun de contrades y de fenomenns dla natöra. Cun so fetizism material y süa dorada cörta adöm cun süa framentaziun y süa daurida strotorala descëda les istalaziuns y les scoltöres de Partelli assoziaziuns ala aziun precara sciöche por ejëmpl i laûrs de Robert Morris y Eva Hesse. Metüs adöm cun brëies fines de lëgn, de pices peres y portà da lians apëna da odëi, é chisc abitać delicać dl’artista asii intims dl’anima, tan co manifestaziuns de strotöres internes stersces mo impò imaginares. Sciöche cantiers da tan che al pê caotics dla porsona feji referimënt a n momënt dla rovina y dl dübe. L’opera antimonumentala de Partelli é na mise-en-scène leala dla decadënza atuala, na proa che mëss malgaratè. Mo tl medemo momënt él inće n tentatif desperè, da se lascè jì fora por le će i motifs y i canonns dl tëmp modern y da i fà sö danü.

Adam Budak curadú