Novitês

Inaudaziun dl urt y dl ciamp dortorè pro l‘Ciastel de Tor y presentaziun cun cercia de produc dl marcé solidal che vëgn venüs tl bar dl Museum Ladin

In vëndres ai 3 de setëmber 2010 dales 18.00 gnaral presentè y inaudè l‘urt y l‘ciamp restruturá dan l‘Ciastel de Tor.

Museum Ladin
Museum Ladin
L'urt dl Museum Ladin

L‘bel urt da paur che é dagnora stè pro l’ćiastel denant che chësc vëgn  adatè a museum, é gnü tut demez tratan i laurs de ressanamënt  y śëgn indô arjigné ca. Giuseppe Miribung da La Val s‘à fistidié da inrescì y spo coltivé dötes les verzöres, erbes, blâs y plantes che fajô pert da vedlamënter incà de n urt tipich prò n lüch da paur, ël spligarà plü avisa sciöche chësc proiet é gnü a sl‘dè. Laprò podaran inće amiré les beles sis tradizionales incër l‘ urt y söl termo, che é gnüdes realisades dala Staziun Forestala d‘ Al Plan de Mareo.

Dales 19.00 inant saràl la presentaziun di produć dl marcé solidal che l‘museum à metü man in chësc ann da adorè y vëne tl bar. An podarà ćiarcé  deplü spëises arjignades ca sides cun verzöra y erbes dl urt co cun produć che vëgn da paisc dl terzo monn tres l‘ marcé solidal. Rudi Dalvai dl‘ assoziaziun Ctm Altromercato spligarà spo ći che ó dì „marcé iüst y solidal – fair trade“ y cuntarà de proieć fora por l‘ monn.  Colaboradus dla „Botëga Dl Monn“ de Urtijëi nes spligarà plü avisa dla proveniënza y l’adoranza de val‘ produć che n‘é nia ćiamò tan conesciüs chilò da nos, sciöche la quinoa, l‘ amarant, l‘ guaranà, l‘ ervamate, l‘ rooibos y i.i.

Un orü mëter adöm chëstes döes iniziatives desferëntes deache dalunc o daimprò se tratera te intrami i caji dla produziun de magiaría, che dess ester poscibilmënter sana, biologica y frësca, che taca adöm ala cultura y tradiziun dla jënt dl post. Tl vers dl marcé iüst y alincuntra de chël globalisé, dess chi che laora la tera y prodüj,  avëi l‘plü dainciarà por che l‘ laur paies la mëia y la jënt pois vire na vita dëgna olà che ara à sües raîsc.