Novitês

27.05.2011 dala 6 da sëira unirà giaurida tl Museum Ladin Ciastel de Tor a San Martin na mostra dal titul “Scibla mo n iede - La ferata de Gherdëina danter lecorc y vijions”.

Per l’ucajion uniral metú a ji na curiera debant che pea via da Urtijëi Plaza Sant Antone dala 4 domesdì y fërma a S.Cristina y te Sëlva. I posc ie limitei perchël iel da se lascé nuté su cherdan su l Museum Ladin.(0474 524020)

La ferata passa l viaduct Marzan
La ferata passa l viaduct Marzan

La mostra dëssa lecurdé la ferata che passova mo dan 50 ani tres Gherdëina y descrì la tapes plu mpurtantes de si storia: dai primes proiec a si realisazion ntan la Gran Viera, dal passé dla gestion sot al stat talian nchin a canche la ie unida tëuta ju, dala particulariteies coche inzidënc y desgrazies ala costruzion di viadoc, puenc o tuniei. Nsci saràl da udëi truep documënc tëuc ora dai archifs, esponac y pec che à da nfé cun la ferata, coche diaresc che lecorda i mumënc dla viera, lëures fac a man che i perjunieres rusc giamiova sun velch da maië.., ma n puderá nce scuté su intervistes a testimonesc, cialé films che reverda la ferata y nchinamei cialé ora da n vier de n “vagon” y fé n viac virtuel da Tluses nchin te Plan.

La mostra sarà da udëi nchin ai 31 ottobre 2011 tl Museum Ladin Ćiastel de Tor ntan i orars dl museum y dal 11.11.2011 nchin al 05.02.2012 tl Zënter Manifestazions Cultureles Tublà da Nives te Sëlva.