Novitês

26.08.2014 Conferënza sön les laûrs de Conturines a S. Ciascian

Crëpa dl Ursus ladinicus
Crëpa dl Ursus ladinicus

Le monn dla laûrs di andri Ursus ladinicus, süa descurida, süa vita, les particolaritês y le tesur dl ander de Conturines: chëstes é les tematiches dl referat dl paleontologh Herwig Prinoth en mertesc, ai 26 de agost, dales 21:15 tla Ćiasa de Cultura Jan Batista Runcher a San Ćiascian. Le referat gnarà tignì por talian, l'entrada é debann.

Ai 23 de setembër dl 1987 à le hotelier y mënacrëp Willy Costamoling da Corvara metü pé por le pröm iade tl ander de Conturines a 2.800 metri sura le livel dl mer, olache al ê 60 scheleć dla laûrs preistorica che à vit dan da presciapüch 40.000/50.000 agn. Do la scoverta de Costamoling à n grup de esperć dl'Université de Viena sot ala direziun dl professor Gernot Rabeder ćiavè fora, mosoré y inrescì l'ander. I resultać dles inrescides à portè a conescënzes sensazionales: la sort de laûrs che an à ćiafè sön Conturines ne é mai gnüda descrita denant y é gnüda nominada, en onur dl post dla scoverta, Ursus ladinicus.

Tl 2011 él gnü daurì le Museum Ladin Ursus Ladinicus a San Ćiascian, olache al é poscibl da vijité y osservè les scovertes dl ander dla laûrs, sciöche por ejëmpl dënz y osc originai che nes cunta la storia y l'ambiënt de vita dla laûrs dan da 40.000 agn. Tl museum él inće da odëi na reconstruziun dl ander, dla laûrs y de n ejemplar plü jonn.

En mertesc, ai 26 de agost, pitarà le Museum Ladin l'ocajiun da podëi ascutè pro a n seminar dl paleontologh y curadù dl Museum Ladin Herwig Prinoth che spligarà plü avisa le monn dla laûrs di andri Ursus ladinicus, dala scoverta ala storia y ales particolaritês dla laûrs y dl ander, sciöche por ejëmpl cara che ê la spëisa dla laûrs, co che ara podô vire tan alalt y por ći gaujes che an pënsa che ara é morta fora. 

Le referat „L'orso delle caverne e la grotta delle Conturines" gnarà tignì por talian y metarà man dales 21:15 tla Ćiasa dla Cultura Jan Batista Runcher a San Ćiascian. L'entrada é debann.

La sëra d'informaziun ai 26 de agost sarà inće le punt de partënza dl vintejimo symposium sön la laûrs di andri (20th International Cave Bear Symposium, http://icbs2014.at/), che gnarà tignì dai 10 ai 13 de setëmber a Corvara y a San Ćiascian y che vëgn organisé dal Istitut de Paleontologia dl'Université de Viena adöm cun le Museum Ladin y cun l'assoziaziun turistica dl'Alta Badia.

Por de plü informaziuns: Museum Ladin, Strada Micurà de Rü 26, 39030 San Ćiascian, tel. 0474 52 40 20, plata internet: http://www.museumladin.it/