Novitês

10.10.2015 Presentaziun dl liber sön l'opereta "Le scioz da San Jênn"da pert dl Museum Ladin a La Pli de Mareo

L'opereta "Le Scioz de San Jênn"
L'opereta "Le Scioz de San Jênn"

Ciamo mai ne él gnü publiche cina sëgn l'opereta ladina "Le scioz de San Jênn". Tl contest dl proiet dl Museum Ladin Ciastel de Tor é sëgn la musiga y le test de chësta opera musicala gnüs elaborá danü. Le resultat final gnará presenté ai 10 d'otober tla Ciasa dles Uniuns a La Plí de Mareo. L'entrada é debann.

Te na iesta moderna cun na verjiun musicala recostruida danü publichëia le Museum Ladin Ciastel de Tor, en colaboraziun cun plü esperc de musiga y de lingaz, por le pröm iade l'opereta ladina "Le scioz de San Jênn" scrita dai auturs Angelo Trebo (1862 - 1888) y Jepele Frontull (1864 - 1930) dan da 130 agn. Les melodies por la publicaziun nöia é gnüdes completades da Fonso Willeit, le test é gnü arjigné ca dal professur Paul Videsott. N contribut important vëgn ince dal espert dl teater y dla musiga de cor ladina André Comploi che á inrescí la vita y l'opera di dui auturs, le svilup y la rezeziun dl'opera, le contignü, la dramaturgia y la musiga dl'opereta.

La verjiun nöia dl'opereta ladina "Le scioz de San Jênn" gnará presentada

en sabeda ai 10 d'otober dales 17

tla Ciasa dles Uniuns a La Pli de Mareo

dal diretur dl Museum Ladin Stefan Planker, adöm a André Comploi, Fonso Willeit y Paul Videsott. Implü gnarál presenté n'atra pert importanta dl proiet ampl dl Museum Ladin: l'orchestraziun menüda dl'opereta da pert de Alessandro Trebo. Al cianta fora dal toch le Cor de Dlijia da La Pli adöm cun i jobleri dles ultimes rapresentaziuns di agn 1995/1995. L'entrada é debann. Por plü informaziuns: www.museumladin.it