Novitês

23 y 24.06.2016: Convëgn internazional tl Museum Ladin: les iscriziuns é davertes

Museum Ladin
Museum Ladin

Le Museum Ladin Ciastel de Tor organisëia ai 23 y ai 24 de jügn n convëgn internazional dediché ales mendranzes linguistiches. Iscriziuns cina ai 10 de jügn.

En ocajiun di 15 agn dala inauguraziun dl Museum Ladin Ciastel De Tor a San Martin tl ann 2001 él sön le program ai 23 y ai 24 de jügn dl 2016 n convëgn internazional sön les mendranzes linguistiches y sü museums. L’incuntada internazionala dess ince ester n’ocajiun d’analisa dl’importanza dles ativités museales por les mendranzes linguistiches t’Europa. N punt de stüde prinzipal dl'incuntada sará les formes futures dla promoziun dl'arpejiun culturala. De plü sará ince i esperc dl setur di museums ala pert, danter l’ater le presidënt dl Consëi internazional di museums (ICOM) Hans Martin Hinz y plü rapresentanc dles mendranzes linguistiches europeiches.

La partezipaziun al convëgn é debann y daverta a düc i interessá. An pó se scrí ite cina ai 10 de jügn tres la plata internet dl Museum Ladin, www.museumladin.it. Le numer di partezipanc é limité. Le convëgn gnará organisé tla sënta dl Istitut Ladin Micurá de Rü.

La scomenciadia vëgn ince sostignida dala FUEN (Federal Union of European Nationalities) y che organisëia dai 18 ai 26 de jügn l’Europeada 2016, le campionat europeich dl jüch al palé dles mendranzes europeiches cun partides ince tla Val Badia y tla Val de Puster.

Por plü informaziuns: Museum Ladin Ciastel de Tor, strada Tor 65, San Martin de Tor,  tel. 0474 524020, www.museumladin.it