Novitês

14/07/2017 Daurida dla mostra: Le monn demorvëia di andri dles Dolomites

Le Frignun dl Cenote
Le Frignun dl Cenote

Canche Willy Costamoling á descurí dan da 30 agn l’Ander de Conturines cun i osc de laurs di andri, êl lunc y lerch le su ander conesciü dles Dolomites. Intratan s’á la situaziun mudé dassënn y le Museum Ladin Ursus ladinicus pó presenté tröpes novités.

Por le pröm iade vëgnel presenté te na mostra l’ander gigant "El Cenote", che é danter le Piz dles Conturines y le Piz Lavarela. Dl 2010 él pié ia na spediziun cun a ce le prof. Francesco Sauro por la esploré.

Cun le gotamënt costant dl’ega da sössot jö s’ál formé tl ander te cënc de milesc de agn de gragn sintri. Ci informaziuns che al é ti sintri y sciöche an fej da les ciafé fora nes mostra le professor Christoph Spötl sön na carota tuta dal Ander de Conturines.

Nia ma muntagnoles, mo tröpes d’atres creatöres liendares vir aladô dles liëndes dles Dolomites ti andri. Che che ó jí plü sot te chësc monn magich pó le fá tl ciantun de letöra cun tesć dla professuria Ulrike Kindl.

Döt chësc y ciamó tröp d’ater ves aspeta tl "monn demorvëia di andri dles Dolomites". La mostra nöia vëgn inaudada

                                                                                    ai 14 de messé dales 18.00

tla Ciasa dla Cultura “Jan Batista Rinna”

strada Berto 23

a San Ciascian.

Al sará presënc al’inauguraziun le diretur dl Museum Ladin, Stefan Planker, le curadú Herwig Prinoth y Gottfried Nagler dl Ofize Parcs naturai.

Ti mëisc de messé y agost dales 10.30 él le curadú dla mostra Herwig Prinoth che acompagnëia fora por la mostra.

La mostra é daverta dal 15/07/2017 al 10/10/2017

Entrada: debann