Comunicać stampa | 22.01.2007 | 10:16

Esposiziun de albert MELLAUNER 26.01- 23.02.2007

Esposizion de chedri dl artist albert MELLAUNER tl Museum Ladin Ciastel de Tor a San Martin de Tor

N vënderdi, ai 26 de jené scumëncia tl Museum Ladin l’atività per l’ann 2007 cun na mostra dl artist albert MELLAUNER.

Coche uni ann vëniel tratà n tema. L’argumënt che unirà aprofondi chëst’ann sarà chël dl juech, dantaldut dal  pont de ududa dl ert, ma nia mé: nsci saral referac che reverda l juech tla storia dl’ert,  l’unirà a s’l dé conzerc cun l tema dl juech y nce pra la II Trienala Ladina, mostra a cuncors che ruva chëst’ann ala segonda edizion,  sarà  la tematica dl juech tl zënter dl atenzion.

La prima mostra de chëst’ann ie ntituleda albert MELLAUNER jüć geometrics – 30 agn de pitöra. Tl Museum Ladin saral da amiré lëures depënc dai ani ’70 nchin aldudancuei. De ndut saral da udëi presciapuech 70 chedri realisei dal artist da Rina che vif y lëura a Burnech y che à juegà ntan si cariera artistica cun la formes geometriches.

L Museum Ladin Ćiastel de Tor a San Martin nvieia dutes y duc ala giaurida dla mostra che unirà fata n vënderdi ai 26 de jené dala 18.00 tla sales dl Museum Ladin a San Martin de Tor. La mostra puderan udëi ntan i orars de giaurida dl museum y plu avisa uni mierculdi, juebia y vënderdi dala 14.00 – 18.00 y ezezionalmënter la dumëmia ai 25 de fauré dala 14.00 – 18.00.