Novitês

24/06/2017 Integra: Istalaziun de Lois Andivalfarei tl ander de Conturines

L'istalaziun de Lois Anvidalfarei dan l'Ander de Conturines /Foto Matteo Vegetti
L'istalaziun de Lois Anvidalfarei dan l'Ander de Conturines /Foto Matteo Vegetti

L’istalaziun gnará inaudada dal artist ladin en sabeda ai 24 jügn. Organisada vëgn la mostra dal Museum Ladin.

N’istalaziun a 2.750 metri sura le livel dl mer tl ander de Conturines: chësta sará la particolarité dla sajiun da d’isté dl Museum Ladin “Ciastel de Tor”. La mostra vëgn realisada dal artist ladin Lois Andifalfarei che sará ince ala pert pro l’inauguraziun ai 24 de jügn dales 12.00 inant.

Al sará da odëi döes scoltöres de metal cun chëres che l'artist oress motivé i vijitadus da fá na reflesciun söl raport compliché danter la natöra y la porsona. Le titul latin dla mostra “Integra” fej referimënt ala locuziun “loco integra” ("posć nia desfac") porvan da colié l’opera d’ert cun le post dl’istalaziun, respetan insciö la storia y la formaziun dl ander. La creaziun artistica de Anvidalfarei vëgn arichida da n test dl scritur Erri de Luca. L’ander de Conturines é tl Parch natural Fanes-Senes-Braies y é dër conesciü por la scoverta tl 1987 de perts de n schelet dla laurs “Ursus ladinicus”, na laurs che á viüt dan da zirca 50.000 agn. Organisada vëgn la mostra dal Museum Ladin Ursus ladinicus.

Düc chi che oress tó pert al’inauguraziun mëss sé prenoté ala vijita acompagnada cina ai 23 de jügn pro l’Assoziaziun turistica de San Ciascian cherdan sö al numer 0471 849422. An piará ia ai 24 de jügn dales 8 dala Capanna Alpina da San Ciascian. N colaboradú dl Parch Natural fajará da acompagnadú. L’escursciun é sfadiosa. Sce al ess da ester bur tëmp gnará la daurida spostada ai 29 de jügn.

Les istalaziuns de Lois Anvidalfarei podará gní vijitades cina ai 23 de setëmber dl 2017. Por plü informaziuns sön les escursciuns y prenotaziuns: www.altabadia.org http://parchi-naturali.provincia.bz.it.