Novitês

6.10.17: Referat tla Ciasa de Cultura J.B. Rinna

I resultac d'inrescida sensazionai nüs tl Ander de Conturines

Le referat dl Prof. Christoph Spötl vëgn tigní en vëndres ai 6 de otober dales 21.15 tla Ciasa J.B. Rinna a San Ciascian, olache an podará dedô ince vijité la mostra ”Le monn demorvëia di andri dles Dolomites”, che restará daverta cina ai 10 d’otober.

L'Ander de Conturines ascognô dlungia les descurides dles laurs di andri ciamó n’atra sensaziun: de gran formaziuns de sinter y pera da toghe, dantadöt tla pert ite insom. Chisc sedimënc conservëia registraziuns straordinares por les Dolomites dles condiziuns ambientales y climatiches di tëmps dla storia dla tera, dî denanco la laurs di andri passass chiló l'invern. Da tigní y dezifré chëstes informaziuns tignides sö tla pera s'á tut dant n grup de laur de geologs internazional sot la coordinaziun dl Prof. Christoph Spötl dl Istitut de Geologia dl'Université da Desproch. Tres na foradura da diamanc él gnü foré tres les stricores de sinter cina 3 m grosses, al é gnü taié sö, slaifé y analisé cun metodes fisicales y geochimiches desvalies les carotes zilindriches arjuntes insciö. Implü é le clima dl ander y sües eghes che gota da sössot jö gnüs monitorá por de plü agn alalungia, por capí ciodí che al ne se forma nia plü peres da toghe aldedaincö dailó y ciodí che les formaziuns se desfanta bel plan. L'archif climatich che é ascognü ti sedimënc dl ander vá derevers de passa n miliun de agn y le Prof. Spötl é sté bun da dezifré chëstes informaziuns.

La conferënza (por todësch) vëgn organisada dal Museum Ladin Ursus ladinicus en colaboraziun cun l'Ofize Parcs naturai.