“Le post é la lerch” é le titul dla mostra olache al sará da odëi operes de artisć y artistes che á davagné la sesta Trienala Ladina y le Pest artistich “Richard Agreiter”. L’inauguraziun é ai 20 de setëmber 2019 tl Museum Ladin a San Martin de Tor.

Pitöres y fotografies, mo ince performances y istalaziuns sura le tema dla lerch – la lerch minada sides sciöche lerch geografica, politica y culturala, sides sciöche lerch architetonica, lerch vita y la lerch sciöche esperiënza. Tla mostra “Le post é la lerch” vëgnel mostré operes de sis artistes y artisć che á davagné le concurs Trienala Ladina y le Pest “Richard Agreiter” 2019. I sis artisć é gnüs chiris fora da na iuria internazionala y vëgn düc dal raiun cultural ladin, dala Val de Fascia cina tl Grijun.

La nöia mostra gnará inaugurada

vëndres 20 de setëmber 2019, dales 19:00,

tl Museum Ladin Ciastel de Tor,

via Tor 65, San Martin de Tor.

Presënc sará le presidënt dla Provinzia Arno Kompatscher, le diretur dl Museum Ladin Stefan Planker, le curadú Günther Moschig, i artisć y les artistes: Annatina Dermont, Yvonne Gienal, Karin Schmuck, Michael Schrattenthaler (davagnadú dl pest “Richard Agreiter”), Claus Soraperra y Tobias Tavella.

Info: Museum Ladin Ciastel de Tor, via Tor 65, San Martin de Tor, tel. 0474 524020, www.museumladin.it