Museumladin - Attivité dl Museo

Conzet por les scores elementares
Museum te gofa
Dala storia ala cossa / Dales stories ales cosses

Le fin dl conzet por les scores elementares é chël da mostrè sö y dessigné do la nasciüda de na esposiziun, de n museum o de na pert de n museum.

Pià ia éson por i conzec de contignü dl Museum Ladin dala "storia" o dales "stories" (la desfarënzia n'é nia relevanta). Tl lingaz dl museum i dìjon "storyline". Vigni storich, scienzié o aministradù à süa idea sogetiva dla "story", dl tëmp passè. "Storics inventëia tl scrì imajes danter les risses".

	Y vignun s'imaginëia l'imparadù Maximilian o la regina Tanna atramënter, vignun à sües idees di avenimënc sön frunt dles Dolomites, vignun porta ite süa vita y süa realté te chëstes imaginaziuns. Y chësc arà süa influënza sön l'impostaziun dl'esposiziun. Bel avisa insciö arà le storich n'influënza sogetiva y ogetiva pro la lita dles cosses che röia te museum. Insciö dij le museologh Gottfried Fliedl: "Le museum trasmët avisa tan püch co la storiografia le tëmp passè sciöch'al "ê n iade", mo dagnora n tëmp passè interpretè. Museums ne fej nia n retrat dl passè, ai le cheriëia."