Idees de basa di museums provinziai de Südtirol
Cares é pa nostes inciaries?
Nostes è istituziuns de formaziun che fej dla cultura n avenimënt y n plajëi estetich.
I esponac che nes vëgn surandês conscidrunse sciöche arpejun culturala che nos i fajun azessibla ala jënt a lungia dorada. Cun n’oferta ampla y variada descedunse l’interès, renforzunse relaziuns multilaterales y pormetunse l’impëgn da foradecà.
Nos valorisun la formaziun aladô de conescënzes didatiches y scientifiches nöies y sostignun la partezipaziun ativa de nostes colaboradësses y de nüsc colaboradus.
Tres evaluaziuns che vëgn fates regolarmënter y tres le mantenimënt di frabicac di museums y dles esposiziuns i dunse a nüsc museums na garanzia de cualité.
Cares é pa nostes prestaziuns?
Nos se dedicun ales inciaries tlassiches de n museum: colezionè, conservè, documentè y intermedié; nos metun impé conzec por museums y esposiziuns, i laurun do le standard internazional aladô dles diretives de ICOM y de Gender.
Nos sun n’istituziun „n movimënt“ y promöiun vijites plü sovëntes cun mostres speziales y d’atres manifestaziuns.
Nos sorantolun ince l’inciaria dla consulënza y dl’archirida y dun inant nostes conescënzes te publicaziuns.
Nosc finanziamënt prinzipal nes vëgn dala man publica. Laprò porvunse da miorè la dotaziun y l’oferta te nostes ciases cun n ponsè y fà imprenditorial modern y cun mesi finanziars ajuntês.
Imaja publica, publizité y relaziuns publiches fajunse do nüsc bojëgns.
Por che laurunse?
Nosta atenziun i va ala populaziun y ales vijitadësses y ai vijitadus y ince ai ghesc de nosc raiun; i sostignun la conescënza de cultura, natöra y storia.
Cun ofertes selezionades por grups de vijitadus desvalis dunse la poscibilité de esperiënzes y odüdes museales individuales.
Tan inant ch’ara va realisunse n azès zënza barieres por dötes les vijitadësses y düc i vijitadus.
Nos arjunjun ince nia-vijitadus (grups de vijitadus nös) cun manifestaziuns speziales.
Co laurunse pa?
Avertënza é por nos n valur etich che val tan begn tles relaziuns danter nos co cun les vijitadësses y i vjitadus y cun le frabicat dl museum y les coleziuns.
Nosta forza é nosta varieté; tres la comunicaziun cheriunse danter nos museums provinziai n spirit de solidarieté. Nos s’indünun por se baié fora, se daidun un y l’ater y s’aricun cun le barat de esperiënzes.
Nos ùn n raport de confidënza y de sostëgn cun nostes colaboradësses y nüsc colaboradus y sciöche aziëndes de sorvisc i junse adincuntra a düc (nüsc vijitadus) cun manires valëntes.
Nos ofriun n laûr de intermediaziun de alta cualité, se mantignun te n dialogh cun d’atres istituziuns culturales y se conscidrun sciöche organisadus dl tëmp lëde cun pretenjiuns scientifiches.
Nos comunicun te na manira adeguada por todësch, talian, ladin y inglesc.
Cun chê laurunse pa?
Nos se dauriun tres rëis de coliamënt y cooperaziun y realisun proiec, manifestaziuns y esposiziuns speziales ince defora di museums. Nos colaborun cun le zenter de sorvisc di museum tla repartiziun cultura, cun le Consorz di museums de Südtirol y cun d’atri museums y istituziuns.
Nos ùn n liam strënt cun aministraziun provinziala, comuns y d’atres istanzes, i chiriun le contat cun istituziuns culturales y de formaziun y porvun da arjunje n bun raport cun uniuns y assoziaziuns.
Sciöche istituziun culturala orunse ancorè damì i museums provinziai tla sozieté. Partners dl’economia, uniuns de sostëgn y cërtli de amisc é de gran importanza por idees nöies y impulsc nös.