Novités
Domënia ai 25 de forà sarà l'Museum Ladin davert domisdé dales 14.00 - 18.00 en ocajiun dl'esposiziun de Albert Mellauner
Drët nteressanta y particulera ie la mostra de Albert Mellauner metuda ora tla sales dl Museum Ladin Ciastel de Tor a San Martin de Tor. L’artist, nasciù sa Rina tl 1947, à studià a Urtijëi, Cortina d’Ampëz, Unieja y Firënza vif a Burnech y à si lëuratuere a San Iöre te Puster. Truepes ie states si mostres metudes a jì nchin dai ani ’70. Te passa 30 ani da artist ie Mellauner te si cariera stat bon de se tenì costant te si lëures astrac deventan n moster di culëures y chisc, liei adum ala formes geometriches cun gran sensibiltà y savëi, devënta na cumposizion de gran armonia plajëula y sarëina. Si maniera, coche dij la dut.a Danila Serafini ie n’astrazion radichela che se lieia te na sinfonia de culëures… Aldò dla storica d’ert ie la composizion de Mellauner n bal de chedri, retangui y triangui, ma una na forma va adum ti cinfins dl’autra fajan a na moda che la strutura se arechësc de particuleres y de desferënzes che dëssa unides nterpretedes aldò dl tëmp y dla sensibiltà de chiche ti cëla al cheder.
Bele ti ani 70 ova Mellauner abù l coraje de to la streda dl astratism, na streda unida splaneda dal artist olandesc Piet Mondrian (1872 – 1944), ma nce la cunescënza dl’esperienza dl Bauhaus o la prospetiva ilujionista dl ungheresc Victor Vasarely (1908 – 1997) ie states mpurtantes per la formazion de Mellauner.
N ucajion dl ultim di dla mostra dl Mellauner sarà l Museum Ladin Ciastel de Tor nce la dumënia ai 25 de fauré domesdi dala 14.00 ala 18.00 daviert. N chël domesdì sarà sambën nce l museum da pudëi vijité. Dala 18.00 inant depona uniral presentà ti salamënc dl Museum Ladin n Cd cun mujiga y cianties ladines dla Familia Schuen da La Val. La prejsentazion unirà fata dal cunesciù musicist y ciantautëur dl Austria Hubert von Goisern.
L Museum Ladin nvieia duc canc a ti cialé ala mostra y a to pert ala presentazion dl bel CD.