Novités
31/08/2007 Giaurida dla II Trenala Ladina y I Pest artistich Richard Agreiter
Inaugurazion dla II. Trienala Ladina cun l Minister per l’Intern dl Austria Günther Platter
Tan che dut ie anjenià ca per la II. Trienala Ladina y per la sëurandata dl I. Pest Artistich de scultura Richard Agreiter che unirà fata ai 31 de agost 2007 dala sies da sëira tl Museum Ladin Ciastel de Tor a San Martin de Tor.
La II. Trienala Ladina ie na mostra d’ert metuda a jì uni trëi ani y a chëla che l tol pert artsć ladins cris ora da na cumiscion de esperc de livel nternaziunel. Per pudëi fé pea à i nteressei pudù dé ju n curriculum o na documentazion de si lëures per se lascé depona valuté. Tla cumiscion fovel chëst’ann Guido Molinari, Alessandro Riva, Letizia Ragaglia, Ilse Thuile y l diretëur dl Museum Ladin Stefan Planker. I artisć che ie unì crì ora ie : Giancarlo Lamonaca, Ivan Lardschneider, Isabell Pitscheider, Roland Senoner y Willy Verginer.
La Trienala ie unida metuda a jì per l prim iede tl 2004 cun l fin de pudëi se fé cunëscer y se lascé udëi da esperc a chëi che n te ruvëssa nia tan saurì permez. Tla prima edizion ova la cumiscion trat ite Lois Anvidalfarëi, Thea Blaas, Aaron Demetz, Gehard Demetz, Philipp Messner y Walter Moroder.
L tema cun chël che i artisć se dajerà ju tla edizion 2007 ie chël dl juech, tema zentrel che vën tratà ntan dut l’ann tl Museum Ladin. Nsci juegherà uni artist a si maniera y cun si vijion estetica tla formes artistiche plu desferëntes: tla fotografia, tl dessëni, tla scultura y tla nstalazion.
Ntan la giaurida dla Trienala iel preudù la premiazion dl I.Pest artstich de scultura Richard Agreiter. La se trata de n pest dat ora dal Museum Ladin Ciastel de Tor su promozion dl artist Agreiter, a artisć dl Tirol storich cun l fin de na promozion artisica preududa per la scultura
L’artist Richard Agreiter, nasciù l’ann 1941 te na familia ladina dla Val Badia, ie ruà a Steinberg am Rofan tl’Austria ntan l opzion dl 1939.
L’individualism, la tendënza al etern y l’imutabiltà ie la carateristiches fundamenteles dla scultures de Richard Agreiter, che ie aldò de Goethe n scultëur tlassich. La figura umana y la natura à per ël na gran mpurtanza. Cun na gran sensibiltà descurel l mister dl’estistënza umana.
L’artist ulova giaté per si culezion artistica n post nuef. Se sentian lià a si ravises ladines ti àl surandàt si culeziun al Museum Ladin Ćiastel de Tor. Danter la Dolomites dla Val Badia à la scoltures de Richard Agreiter giatà n post ideal ulache les possa se spidlé.
N unëur a chësc gran artist iel unì metù a jì tl Museum Ladin chësc I. Pest artistich de scultura Richard Agreiter.
La cumiscion dl pest artistich fova metuda adum da Guido Molinari, Alessandro Riva, Letizia Ragaglia, Ilse Thuile y n rapresentanza de Agreiter nce Günther Moschig. La cumiscion à ulù de ora doi segondi pesc ex aequo a Gehard Demetz de Sëlva per si l lëur artistich “I want to be flexible”, per l fortl de ti dé ite n lingaz nuef ala scultura de lën. L lëur manuel ti vën metù dant ala dimenscion dl aspet da uni di, a chëla che l ti vën dat na gran ahta, zënza stlù ora n raport de balanz danter l monumentel y l ntimism psicologich; a Hubert Kostner de Ciastel, per si lëur artistich “Accessorie”, per l fortl de se cunfrunté creaticamënter cun la marueies natureles dla Dolomites. Te si proiet de sort cunzetuela vëniel inò tëut su la forza estetica dl mitel n con de material lià ala tradizion.
Per la gran ucajion iel unì nvià ghesć de unëur y danter l’auter l Minister per i Interns dl Austria dut. Günther Platter, l Presidënt dl Guviern Provinziel dut. Luis Durnwalder, l’Assessëur ala Cultura Ladina dut. Florian Mussner y l’assessëura ala Cultura Tudëscia y dut.a Kasslatter Mur. La ntroduzion dla mostra y dl pest artistich, dal pont de ududa storich artistich, unirà tenida dal cunesciù critich d’ert dut. Guido Molinari y da mag. Günther Moschig. Presënc sarà nce l Presidënt y l Vize presidënt di Museums Provinziai dut. Bruno Hosp y dut. Heinrich Huber ora che sambën l’artist Richard Agreiter.
L Museum Ladin nvieia duta la populazion a unì ala giaurida dla mostra, n vënderdi ai 31 de agost dala 6 da sëira tla sales dl Museum Ladin a San Martin de Tor. La mostra resterà davierta nchin ai 31 de utober dal merdi ala sada dala 10.00 – 18.00 y la dumënia dala 14.00 ala 18.00.