Novités
Daurida dla mostra 3ª Trienala Ladina dal titul “Mirrored Stories” y surandada dl 2º Pest artistich de scultöra Richard Agreiter
L Museum Ladin Ćiastel de Tor de San Martin à scrit ora per l ann 2010 bën doi cuncorsc artistichs. L se trata dl “Pest artistich de scultöra Richard Agreiter”, che do l 2007 ie ruvà chëst’ann a si segonda edizion, y dla “Trienala Ladina” , che chëst’ann se prejënta cun l titul “Mirrored Stories” y che ie urmëi ruveda a si terza edizion.
Ala 3ª Trienala Ladina possa tò pert i artisc dla 5 valedes ladines dolomitiches (Val Badia, Gherdëina, Val de Fascia, Fedom y Ampëz), dl Cianton di Grijons tla Svizera y dl Friul. La partezipazion al cuncors ie daviërta al’artistes y ai artisc ladins o nce a chëi che à n liam particuler cun la storia, la cultura y la tradizions ladines. L tema dla 3ª Trienala Ladina dal titul “Mirrored Stories” se ispira al prinzip “Tl museum, por comunichè…” y, plu n generel, mira la mostra a revalutè la criazion artistica ti raions numinei y a ti dè la puscibeltà ai artisc de se mustrè al mond dl’ert, ala critica y a n publich plu grant. La 3ª Trienala Ladina se gëura a duc i jëndri artistichs.
I premiei dla 3ª Trienala Ladina
Ai 13 de merz à la cumiscion metuda adum da esperc y critics d’ert nternaziunei, numinà i artisc dla 3ª Trienala Ladina y nce l scultëur che à venciù l 2° Pest artistich de scultöra Richard Agreiter. Di 36 artisc y artistes che à tëut pert ala 3ª Trienala Ladina, 33 ladins, 2 dl Friul y 1 di Grijons, iel unì crì ora chisc 6 inuemes.
Romana Prinoth de Sëlva (Gherdëina)
Esther Schena dl Cianton di Grijons (Svizera)
Barbara Tavella da La Val (Val Badia)
Veronica Zanoner dla Val de Fascia
Peter Demetz de Urtijëi (Gherdëina)
Claus Vittur da La Ila (Val Badia)
I artisc premiei muessa fè n lëur ispirà al tema “Tl museum, per comunichi..”. L’operes vën metudes ora tl cuntest dla mostra culetiva 3ª Trienala Ladina, che gëura ai 23 de messel y jirà inant nchina ala fin de utober tl Museum Ladin Ćiastel de Tor.
2º Pest artistich de scultöra Richard Agreiter
Bën 53 ie i artisc (31 ladins, 12 sudtirolejes y 10 austriachs) che à fat pea pra l 2º Pest artistich de scultöra Richard Agreiter. L Pest artistich de scultöra Richard Agreiter ie daviërt a duc i artisc dl Tirol storich (Tirol dl Nord, Tirol dl Est, Südtirol y Trentino) y ai artisc dla valedes ladines de Badia, Gherdëina, Fascia, Fedom y Ampëz. L inuem dl scultëur che à venciù i 10.000 Euro dl cuncors y nce i cumëmbri dla giurìa nternaziunela, unirà fac al savëi permò n ucajion dla giaurida dla mostra culetiva 3ª Trienala Ladina.
La giaurida dla mostra culetiva y la sëurandeda dl Pest artistich de scultöra Richard Agreiter ie preududa per i 23 de messel 2010 dala 18.00 tl Museum Ladin Ćiastel de Tor a San Martin. L ie cunfermeda la prejënza di artisc premiëi y, danter l auter, de Luis Durnwalder, Presidënt dl Guviërn Provinziel de Bulsan, Beate Palfrader, Assessëura ala Cultura dl Land Tirol (Austria), Adam Budak, curadëur dla mostra y Richard Agreiter, artist y promotëur dl cuncors de scultura.