Da udëi iel la proietazions fates dan feter 100 ani, documentazions dl frabiché y la tapes dla ferata che ie furneda dal 1916 per 44 ani. De nteres particuler ie la vijions che bera Josef Rifesser da Stufan (Urtijëi) ova abù te chëi tëmps. Ntlëuta fovel stat gran nteres per na ferata da Bulsan a Cortina, Rifesser ulova la fé passé tres Gherdëina. La vijions che n ova bele dan n secul, possa tla mostra unì paredledes a doi proiec de na ferata dal didancuei. Da udëi saral nce doi modiei, un dla ferata de Gherdëina y un de chëla de Renon fata su ti medemi tëmps.

La mostra dëssa lecurdé la ferata che passova mo dan 50 ani tres Gherdëina y descrì la tapes plu mpurtantes de si storia: dai primes proiec a si realisazion ntan la Gran Viera, dal passé dla gestion sot al stat talian nchin a canche la ie unida tëuta ju, dala particulariteies coche inzidënc y desgrazies ala costruzion di viadoc, puenc o tuniei. Nsci saràl da udëi truep documënc tëuc ora dai archifs, esponac y pec che à da nfé cun la ferata, coche diaresc che lecorda i mumënc dla viera, lëures fac a man che i perjunieres rusc giamiova sun velch da maië.., ma n puderá nce scuté su intervistes a testimonesc, cialé films che reverda la ferata y nchinamei cialé ora da n vier de n “vagon” y fé n viac virtuel da Tluses nchin te Plan.