Novités
13.04.2015: Renforzé le liam danter i jogn y i museums - presentaziun de Young & Museum
Motivé i jogn y les jones da se dé jö cun i museums y sü contignüs y sensibilisé i museums sön i interesc dla jonëza: chisc é i dui obietifs prinzipai dl ann tematich 2015 „Young & Museum" dla Repartiziun Museums y dl'Assoziaziun Museums Südtirol. „I museums dess ester n post d'incuntada, de vita y de barat por nüsc jogn", á sotligné l'assessur Florian Mussner tratan la presentaziun a Balsan.
Co pon pa motivé la jonëza dl Südtirol da se dé jö cun i museums? Cares é pa les scomenciadies che motivëia i jogn da lauré adöm cun i museums? Ci practicums é pa d'öga por porsones jones cun dificoltés? Chëstes é n valgönes dles domandes prinzipales a chëres che l'ann tematich dl 2015 dal titul „Young & Museum" á chirí respostes y che é gnü presenté in lönesc ai 13 de aurí tl Museum Archeologich a Balsan. „L'ann tematich dess ester na motivaziun implü por i jogn da se dé jö cun i contignüs desvalies y da odëi i museums sciöche posć de barat cultural, moderns y plëgns de vita", á splighé l'assessur por i museums Florian Mussner y á sotligné che por arjunje chësc fin á les Repartiziuns di Museums y dla Mobilité metü adöm n proiet de cooperaziun. „Tres chësta colaboraziun podará i jogn cun l' Abo+ vijité dötes les 15 sëntes di Museums provinziai y atri museums debann tratan l'isté dai 17 de jügn ai 6 de setëmber", á splighé le diretur dla Repartiziun Mobilité Günther Burger. „La colaboraziun cun la jonëza é de importanza fondamentala por le svilup di museums. Tröc jogn á ciamó n'idea n pü'vedla di museums, nosta intenziun é chëra da ti presenté 'nüsc' posć sciöche punc d'incuntada inovatifs", á splighé Karin Dalla Torre, la direturia dla Repartiziun Museums y dl'Aziënda Museums dl Südtirol. Le liam danter i jogn y i museums dal punt de odüda di jogn instësc é gnü porté dant cun na rapresentaziun teatrala da Benedikt y Jonathan Troi tl mëteman dl'incuntada cun i media.
De plü é les scomenciadies che reverda i Museums provinziai y atri museums, galaries y posc d'incuntada cun mostres, colaboraziuns a proiec d'ert, sëres de cinema y musiga, concursc de fotografia y de poesia (le program cun dötes les manifestaziuns é gnü injunté). N proiet concret é danter l'ater „JAI - Jonëza Laur Integraziun" metü da jí en colaboraziun cun la Cooperativa soziala dl EOS da Bornech, che prevëiga l'intlujiun tl monn dl laur di jogn y dles jones te situaziuns de vita complicades tres practicums de colaboraziun cun i museums. N ater ejëmpl é le proiet „MuJuK" (Museums - Jonëza - Ert) che ti pita ai jogn y ales jones la poscibilité, tratan la perioda da d'isté, da colaboré cun artistes y artisć pro la realisaziun de mostres y de obiec d'esposiziun te museums desvalies dla Provinzia. „N atra scomenciadia é i poetry slams, olache al gnará scrit tesć por i presenté daldô sön paladina", á splighé Johanna Ortner dl'Assoziaziun Poetry-Slam LIPO.
N secundo aspet dl ann tematich reverda indere i museums instësc. Preodü él n convëgn dal titul „Südtiroler Museumsgespräche" tl mëis de má en colaboraziun cun l'Academia di Museums dl Payern. La coordinadëssa dl ann tematich Ute Duregger á sotligné che l'obietif é chël da orëi amplié la colaboraziun ince tl dagní cun aziuns mirades por cherié na basa de plü cooperaziuns de plü agn.
Le moto „Young & Museum" fajará ince da cornisc por n valgönes scomenciadies sciöche por ejëmpl ai 17 de má le Dé internazional di Museums y ai 27 de novëmber tratan la „Nöt lungia di Museums de Balsan", döes dates che ti pita ai vijitadus la poscibilité da vijité i museums debann.
Le Museum Gherdëina mët da jí por le "Dé internazional di Museums" ai 17 de má trëi scomenciadies dales 14 ales 18: „Tl ruchsoch de Luis Trenker", n aziun de jüch en gaujiun di 25 agn dala mort dl regist, atur y mënacrëp de Urtijëi Luis Trenker, la scomenciadia „Denant portâl l'inom de cutter", na cërcia dl monn di films cun le produzënt Matthias Höglinger y le proiet „De pici grops" cun jogn mënacrëp y alpinisć dla „Grupa Alpinisć Gherdëina".
Por alisiré la suraodüda sön les scomenciadies planificades dl 2015 él gnü cherié la plata internet „Young Museum", olache an ciafa dötes les informaziuns ütles sön dates y proiec