Novitês

Museum Ladin: la mostra „Trienala Ladina“ ciamó da odëi cina de setëmber

Trienala Ladina 2019
Trienala Ladina 2019

Cina le 13 de setëmber sarál ciamó les operes dla mostra coletiva d’ert “Trienala Ladina” metüdes fora tl Museum Ladin Ciastel de Tor.

Dal 19 de ma é le Museum Ladin indô davert. Baldi sarál val’ salamënt dl’esposiziun permanënta stlüt al publich. An á porchësc orü tigní por plü dî la mostra temporana te museum y che sará insciö da odëi cina le 13 de setëmber 2020. Ara se trata de na mostra d’ert cun operes de artistes y artisć contemporans, che é gnüdes metüdes fora tl museum en gaujun dl proiet “Trienala Ladina 2019” dal titul “Le post é la lerch”.

Chëra da sëgn é la sesta ediziun dla Trienala Ladina, concurs a chël che al pó tó pert dötes les artistes y artisć dles cinch valades ladines dles Dolomites, dl Ciantun Grijun dla Svizera y dl Friul, sciöche ince düc chi che se sënt ladins y á n lian cun la storia, cultura o tradiziuns ladines. Les trëi davagnadësses y i dui davagnadus, Annatina Dermont, Yvonne Gienal, Karin Schmuck, Claus Soraperra e Tobias Tavella, á podü mëte fora sües operes tl museum. Lapró él ince gnü metü en mostra les operes dl davagnadú dl Pest artistich „Richard Agreiter, evënt che vëgn tres tigní adöm ala Trienala Ladina, Michael Schrattenthaler.

Argomënt y protagonist dl’ediziun atuala é la lerch te dötes sües formes. Sciöche le curadú dla mostra Günther Moschig á splighé tratan la daurida tl setëmber dl ann passé: ”Cun chësta mostra él le Museum Ladin instës che devënta la lerch dl’aziun artistica. Fajon insciö vëgnel metü en discusciun le lian tradizional danter lerch y identité coletiva, danter lerch y confins vedli oramai deventá familiars”. Propi do chësc moto, insciö Moschig, “él la lerch culturala ladina che se mostra sciöche prototip de na lerch daverta, delibrada da sü confins, en oposiziun cun l’idea de na lerch fisica y culturala stlüta ite ti confins de n stat-naziun”.

Le museum é davert dal mertesc ala sabeda dales 10 ales 16 y la domënia dales 14 ales 18.




Museum Ladin Ciastel de Tor

Str. Tor 65, I-39030 San Martin de Tor

Tel. +39 0474 524020

E-Mail info@museumladin.it Web www.museumladin.it

Facebook www.facebook.com/Museum Ladin