Novités
15/06-12/08/2007 giaurida dla mostra de Roland Senoner
N juech ambivalënt y „scialdi seriëus“ tla lesierëza dla plumes de Roland Senoner
N’ert rigurëusa - chëla de Roland Senoner, ma che propi per si nrescida ussessiva, toca chi che ti cëla l trajan ite te si rë magica, che ie danz, fata de regules damat seriëuses. De là dala prima udleda plajëivla y ala semea saurì azessibla, ie i lëures dl artist de Gherdëina purtadëures de n’ambguità de fonz. Sun la gran sperses de papier iel reprejentà series de plumes muzedes de gial grisc, n motif cris ora dal artist che devënta l modul per ezelënza dla cumposizions, che ti dà ritm y forza ala operes, ma che devënta nce pretest y se tramuda tresora te n sëni mez astrat. Na pluma vën for mé reprejenteda n pert y metuda adum cun d’autres, che ne ie mei medemes. Tl prim scialdi lucëntes y scures, devënteles for plu linëuses y majeres fajan pea na tramudazion dl viers dl astrat. L cuntrast danter linëus y scur giata for plu valënza y l dà vita a na sort de „modui“ de pluma, ciariei de na energia nueva. Chisc elemënc à na forza tridimensciunela che concuistea chi che ti cëla y l ambient ntëurvia, ma i ne se lascia nia ndividué defin lascian nsci pro juesc de cumbinazion meifinei. Chisc juesc possa resté mentei o deventé fisics y cuncrec coche te chësta mostra tl Museum Ladin Ciastel de Tor.
L spirt jughënt di modui de plumes ie a uni moda lià a na cumponënta scialdi seriëusa, na cumbinazion che possa unì auzeda de valor dala reletura de n liber tlassich coche Homo ludens de Johan Huizinga. Aldò dl storich olandesc ie l juech zeche de seriëus y l ie dantaldut n at liede; l juech sëurapassa i lims dl’ativiteies bret biologiches: l ie na funzion che à n si senificat. La reflescions de Huinziga possa valëi coche idea de basa dl juech tl’opera de Roland Senoner nstëssa: n juech purtadëur d’ambivalënza, te chël che la regules dla semienza al vere vën rotes y ulache uni un de nëus ie liede de purvé ora na lingia de cumbinazions.
I jugadëures-nuzadëures ie cherdei, adum cun l artist, de purvé ora pusciblteies meifinedes de dessëni y a ti jì do ala nrescida de senificat ndividuel y intim che l artist fej zënza zeder.
Presënc al’inaugurazion:
Dr. Bruno Hosp, Presidënt di Museums Provinziai de Südtirol
Dr. Heinrich Huber, Vicepresidënt di Museums Provinziai de Südtirol
Dr. Florian Mussner, Assessëur ala Cultura Ladina
Dr. Lisa Trockner, storica d'ert
Roland Senoner, l’artist
Mujica: grupa de percuscionisc dla Scola de mujiga de Gherdëina