Comunicać stampa | 26.03.2019 | 09:02

L Museum Ladin lascia al savëi i inoms di artisc/artistes che á davagné la Trienala Ladina 2019 y le concurs Richard Agreiter - cumpré jö scoltöres d'ert

Dermont Annatina, Gienal Ivonne, Schmuck Karin, Soraperra Klaus y Tavella Tobias: chisc é i artisc y artistes che presentará sües operes ala Trienala Ladina che pëia ia da setëmber 2019 y döra cina jügn dl 2020. Chësta sará la sesta ediziun dla Trienala Ladina organisada dal Museum Ladin Ciastel de Tor a San Martin de Tor. I inoms di davagnadus, che á sües raisc te arees desvalies dla cultura ladina, é gnüs chiris fora da na iuria de esperc internazionai dl’ert. Dla iuria ál fat pert Adam Budak, curadú dla Galaria Nazionala de Praga, Cristiana Perrella, direturia dl Zënter d’Ert Contemporanea Luigi Pecci a Prato, Stefania Pitscheider, direturia dl Museum dles Ëres a Hittisau tl‘Austria, Gianfranco Maraniello, diretur dl Mart a Rorëi,  Günther Moschig, storich d’ert y curadú de mostres.

La Trienala Ladina 2019 á sciöche fin chël da valorisé y sostigní l’ativité artistica ti raiuns ladins ti pitan l’oportunité ai artisc y ales artistes da se fá conësce a n publich ampl y a esperc dla critica artistica. Tó pert al concurs artistich á podü düc i artisc y les artistes dles valades ladines dles Dolomites (Val Badia, Gherdëna, Fodom, Fascia y Ampëz) dai Grijuns y dal Friul y düc i artisc che á n lian particolar cun la cultura y la storia ladina.

L’artista dl Tirol dl Nord Schrattenthaler Michael é gnü nominé davagnadú dl concurs Richard Agreiter – compré jö scultöres d’ert. La iuria por chësc cuncurs ê metüda adöm dala storica d’ert y direturia dl Museum dles Ëres a Hittisau tl‘Austria Stefania Pitscheider, Günther Moschig storich d’ert y curadú de mostres, Aron Demetz artist y le Diretur dl Museum Ladin Stefan Planker.