Por chi che ne oress nia lascé ester dl döt la cultura tratan chisc tëmps de Coronavirus y carantena, él la poscibilité de vijité virtualmënter valgügn museums provinziai.

Le Touriseum y le Ciastel Trautmansdorff, por ejëmpl: Le Museum dl Turism de Südtirol pita n iade virtual tl tëmp ala descurida di 200 agn de tradiziun turistica dl Tirol. Chi che se mët sön tru te chësc iade, ciafa fora sciöche n teritore, che dan da secui gnô passé ia a pe o cun la gücia por la posta da crameri, peregrins y artisć, sides incö deventé na moderna destinaziun por turisć. An pó jí ite tla tour virtuala tres la plata internet dl museum www.touriseum.it.

Al é indere la storia dl Südtirol dl ‘900 la tematica dla tour virtuala „360 – La tor dles recordanzes“, che é da odëi tla gran tor de Ciastel Tirol. Chësta tour é ponsada suradöt por studënc y insegnanc y ara porta dant 9 biografies imaginares basades sön fac storics reai. An pó la odëi jon sön la plata internet dl museum www.casteltirolo.it.

Ince le Museum Ladin nes pita la poscibilité, oramai da val‘ ann incá, da vijité virtualmënter sües döes sëntes. La tour virtuala tres le Museum Ladin Ciastel de Tor nes mostra la cultura di plü co 30.000 ladins, nes cunta de so lingaz y dla contrada demorvëia dles Dolomites. La vijita virtuala tres le Museum Ladin Ursus ladinicus nes cunta deperpo dla laurs di andri preistorica, de so habitat de dan da 40.000 agn y dla geologia dles Dolomites. An ti röia pormez tres la plata internet dl museum www.museumladin.it.

Y tlafinada él le Museum Archeologich de Südtirol che nes pita cinamai döes app cun audio visa, öna por n publich scialdi adult (Android y iOS, cost: 1,99 Euro) y öna debann por mituns y mitans (Android y iOS) (http://www.iceman.it/de/audioguide-app/). Düc dui i programs nes scinca la poscibilité de se fá na roda tl tëmp de Ötzi, zënza gnanca messëi gní fora de ciasa.