Novitês

17/05/2009 Dé internazional dai museums y festival di cors dla Val Badia

(dc) A na domenia daldöt particolara envieia ai 17 de mà le Museum Ladin Ciastel de Tor y l'EPL – Ert por i Ladins, la uniun dai artisc dla Val Badia, en ocajiun dal dé internazional dai museums.

Sora döt le monn èl museums co ti pita al gran publich orars, programs y condiziuns d'ezeziun, por envié la popolaziun da ti dé na vidlada daete ales esposiziuns y ales tematiches museales.

En cösta ocajiun èl gnü motü a jì la colaoraziun danter le Museum Ladin y l'EPL, che al vegni a sal dé en mix enteressant tal program dal dé, por trepa jont. Por festejé i 50 agn dla fondaziun dal EPL – Ert por i Ladins, motüda empè dal 1960, gnaral tegnì sön l'areal de Ciastel de Tor, en festival dai cors co fej pert dla seziun “Cianté” de cösta uniun dai artisc ladins. Le program veiga danfora la daurida dal Museum Ladin dales 10.00 danmisdé. En ora dedo, dales 11.00, gnaral zelebré la Santa Messa alaleria, abelida dai cors de dlijia da San Martin de Tor, Lungiarü y La Val y zelebrada da Siur Iaco Ploner, enstes artist atif desco lirich y leterat. Dertan la marena y tres döt le dé fora, saral i cors co se baratarà jö te söes prejentaziuns profanes de cianties popolares ladines y todesces. Al sarà presentes deplü autoritês dal ciamp cultural y sozial, co portarà söes parores de salüde y al gnarà soradé onoranzes a chi colaoradus dal'EPL, co s'à fat miric por i cors y por le cianté tla Ladinia. Ales 6 da sera gnaral slüt jö le dé, ciantenn düc deboriada le Inn Ladin “Bel lingaz dla uma cara”.

Le publich arà döt le dé l'ocajiun da ciaré al Museum Ladin Ciastel de Tor, co è önn dai plü enteressanc lunc y lerch, iolan ala conzeziun dinamica, tecnologica y interativa de so program espositif – cossa co l'alza fora tal monn museal y l'à fat conesce a der trec enterescês de cultura y storia ladina. Daverta è ince la mostra atuala dal artist y designer Adalbert Tolpeit da Pederoa dal titul: “Design en liberté”. L'entrada en le dé internazioal dai museums è debann. Y le Museum Ladin ponsa ince ai mendri, metenn a desposiziun deplü jüc y poscibilitês d'entratenimont, cina al orar de slüta, co sarà dales 6 a sera. Chi co ô lascé l'auto tal raiun da parché dl ciamp sportif da San Martin, po s'anüzé dal shuttlebus debann, co sará ativ dales 10.30 ales 14.30.