Novitês

12.08. – 09.10.2011

Mostra Oswald von Wolkenstein in Art 1961-2011 Dal 12.08. – 09.10.2011 te Sëlva

Blason dl Chemun de Sëlva
Blason dl Chemun de Sëlva

N vënderdi ai 12 de agost iela stata giaurda  tl Zënter Manifestazions Cultureles Tublà da Nives te Sëlva la mostra dal titul „Oswald von Wolkenstein in Art 1961-2011“. La scumenciadiva dla mostra ie stata organiseda dal Museum Ladin Ćiastel de Tor y dal Chemun de Sëlva.

Da canche l ie inò unì scuviërt tl 1798 à Oswald von Wolkenstein, nasciù dl 1377, ispirà  tuadëures, scritëures, musizisć y dantaldut pitëures, desseniadëures y scultëures che se à dat jù cun la nterpretazion de si vita straurdinera y rica d’aventures (1377-1445).

L ciavalier da un n uedl, de chël che l besavon ova cumprà n l ann 1293 ciastel y suneria de Wolkenstein, se n ie bele jit da cësa canche l ova 10 ani per mparé l ert dl’ermes y cunëscer l mond ruvan nchin tla Persia.

Cun na gran forza de ulentà y determinazion iel stat bon de arpizé la scela soziela nchin a deventé l servidëur y cunsiadëur de Rë Sigmund (dal 1415) – ma l fova nce n ciantautëur, n ciantarin y n musizist da talënt y si cianties a una o doi ujes deletea l publich nce mo ncuei do 600 ani.

Vin, ëiles y cianté, deberiëda cun d’uni sort de matades y ntraunides fetres ntan si viages ie unides tëutes sciche argumënc de na lingia de chedri. Tla mostra „Oswald von Wolkenstein in Art 1961-2011“ saral da udëi 94 chedri fac da 14 artisć de rujeneda tudëscia tl ultimo mez secul per dé inò vita al mytos de Wolkenstein.

l curadëur ie Hans-Dieter Mück, che ie ënghe curadëur dla mostra “Ie Wolkenstein” a Ciastel Tirol.

I artisc dla mostra:

Rudi Maria Complojer (*1938;Unterinn/Ritten)

Simon Dittrich (*1940; Stuttgart)

Wolfgang Ehehalt (*1939; Stuttgart)

Thomas Escher (*1966; Hamburg)

Harald Reiner Gratz (*1962; Schmalkalden/Thüringen)

Professor Dieter Groß (*1937; Stuttgart)

Helmut Herbst (*1945; Waiblingen)

Ambrosius Humm (*1924; Wädenswil)

Hans-Ruprecht Leiß (*1954; Flensburg)

Ingeborg Leuthold (*1925 Berlin)

Peter Malutzki (*1951; Flörsheim am Main)

Professor Armin Münch (*1930; Rostock)

Thomas Rother (*1937; Essen)

Johannes Vennekamp (*Berlin)

 

Orar fina ai 9 utober 2011

Da merdi a dumënia: 10 – 12 y 16 – 18

Tl Zënter Manifestazions Cultureles Tublà da Nives te Sëlva