Novitês

N vënderdi ai 18 de nuvëmber unirà n ucajion dla giaurida dla mostra sun la ferata de Gherdëina te Sëlva, prejentà l catalogh de chësta mostra metuda a jì dal Museum Ladin.

La prejentazion tl Tublà da Nives ie prugrameda per la sies da sëira.

La mostra sun la ferata de Gherdëina dal titul “Scibla mo n iede, la ferata de Gherdëina danter lecorc y vijions”, ie unida fata sun la basa de na nrescida y de truep esponac. L liber che unirà prejentà te Sëlva dëssa vester na documentazion di esponac, y dla tematiches che ie unides tëutes n cunsciderazion tla mostra. I tesć ie unì scric da Elfriede Perathoner sun l cunzet dl diretëur dl Museum Ladin Stefan Planker che se à nce cruzià dla nrescida y dla documentazion di esponac.

La mostra fova da udëi nchin ala fin de utober 2011 a San Martin, tla sënta dl Museum Ladin, sarà da udëi nchin ai 12 de fauré 2012 te Sëlva.

L sarà da udëi la proietazions fates dan feter 100 ani, documentazions dl frabiché y la tapes dla ferata che ie furneda dal 1916 per 44 ani. De nteres particuler ie la vijions che bera Josef Rifesser da Stufan (Urtijëi) ova abù te chëi tëmps. Ntlëuta fovel stat gran nteres per na ferata da Bulsan a Cortina, Rifesser ulova la fé passé tres Gherdëina. La vijions che n ova bele dan n secul, possa tla mostra a S. Martin unì paredledes a doi proiec de na ferata dal didancuei. Da udëi saral nce doi modiei, un dla ferata de Gherdëina y un de chëla de Renon fata su ti medemi tëmps.

Duta la populazion y i culaburadëures di media ie nvieda ala prejentazion dl catalogh y ala giaurida dla mostra.

n vënderdi ai 18 de nuvëmber 

dala 18.00 

tl Tublà da Nives te Sëlva.

La prejentazion y giaurida unirà tenida n prejënza dl ambolt de Sëlva Peter Mussner, dl diretëur dl Museum Ladin Stefan Planker, l autora Elfriede Perathoner y Günther Denoth dl Archiv turistich dl Land Tirol.