Novités
Trienala Ladina 2016: I davagnadus é gnüs chiris fora
Dan da püch él gnü stabilí i sis artisć che tolará pert al’ediziun nöia dla Trienala Ladina, la mostra coletiva dl’ert ladina che metará man te setëmber al Museum Ladin Ciastel de Tor a San Martin de Badia. I artisć davagnadus é gnüs chiris fora danter 44 candidatöres da na iuria internazionala.
Hubert Kostner, Gabriele Grones, Vanessa Layher (Nessi), Notta Caflish, Simon Perathoner y Andreas Senoner: chisc é i sis artisć y artistes che presentará sües operes ala Trienala Ladina che pëia ia da setëmber 2016 y döra cina jügn dl 2017. Chësta sará la cuinta ediziun dla Trienala Ladina organisada dal Museum Ladin Ciastel de Tor a San Martin de Badia. I inoms di sis davagnadus, che á sües raisc te arees desvalies dla cultura ladina, é gnüs chiris fora da indöt 44 candidatöres dades jö da pert de esperc internazionai dl’ert. Dla iuria ál fat pert Adam Budak, curadú dla Galaria Nazionala de Praga, Karin Pernegger, direturia dl Kunstraum Desproch, Gianluca D’Incà Levis, curadú de Dolomites contemporanees y Carl Aigner, diretur artistich dl Museum regional dl Niederösterreich de Sankt Pölten.
La Trienala Ladina 2016 á sciöche fin chël da valorisé y sostigní l’ativité artistica ti raiuns ladins ti pitan l’oportunité ai artisć y ales artistes da se fá conësce a n publich ampl y a esperc dla critica artistica. Por le cuinto iade él le Museum Ladin Ciastel de Tor che mët insciö da jí la „kermesse artistica“ plü aspetada tles valades ladines.
Tó pert al concurs artistich á podü düc i artisć y les artistes dles valades ladines dles Dolomites (Val Badia, Gherdëna, Fodom, Fascia y Ampëz) dai Grijuns y dal Friul y düc i artisć che á n lian particolar cun la cultura y la storia ladina.
Por plü informaziuns: Museum Ladin Ćiastel de Tor, strada Tor 65, San Martin, tel. 0474/524020 www.museumladin.it