Novités
14-20.02.2015 - Videospots, videoclips y drones: workshop por jogn tl Museum Ladin
Le Museum Ladin Ćiastel de Tor organisëia, en colaboraziun cun le Sorvisc ai Jogn Val Badia, en workshop por jogn danter i 14 y i 20 agn. An pò imparè da fà videospots y videoclips inće cun l‘aiüt de na drona. Le curs gnarà fat dai 14 ai 20 de forà 2015 al prisc de 10 euro. Le fin é de realisé cun de pici grups de laûr videospots y videoclips sura le museum. I jogn gnarà acompagnà da esperć te chësc ćiamp. Ensciö saràl esperć che mostra co adorè na drona, sciöche an pò l' adorè por fà films, ći poscibilitês che chësc mesum nü nes pîta y ćiöna che é la normativa che regolëia dal 2015 inant l' adoranza de na drona. Laprò gnaràl insigné da se dè jö cun la grafica y design por video, filmé y mëte adöm en pice spot o film, taié le film tres l'aiüt de programs tl Ofize di mesi audiovisuai de Balsan. En colaboraziun cun le stüde "Davide Records" podaràn taié pro l'audio y le mëte ite te en filmat, mo inće taié files audio y tòć de musiga y imparè da capì tan inant che an mëss tignì ite i dërć d'autur sce an tol files video, audio o fotos de d'atri.
Le workshop metarà man la sabeda ai 14 de forà y jarà inant dal lönesc 16 de forà ćina le vëndres ai 20. Ai 17, dedolönesc de carnescè, sarà le domisdé lëde. Le orar tignarà cunt di coliamënć dla coriera sides dl'Alta che dla Bassa. Dala incrujada da San Martin ćina al ćiastel gnaràl metü a disposiziun n pulmin.
An po se prenotè te Sorvisc ai Jogn ćina ai 5.02.15. Por informaziuns o por le program plü avisa pon contatè le Museum Ladin Ćiastel de Tor a San Martin sot al numer 0474/524020, o ince le Sorvij ai Jogn dla Val Badia cherdan sö le numer 0474/523070.