Ince chësc ann pëiel indô ia te Südtirol l'iniziativa por trá adlerch i jogn ti museums. Dai 13 de jügn cina ai 6 de setëmber 2020 él studëntes/studënc y scolares/scolars che á n abonamënt abo+ varënt che pó vijité debann 55 museums te döta la provinzia de Balsan - sambëgn mëssel gní respetades les mesüres igieniches de segurëza cuntra le covid!

An pó en gran pert rové pro ai museums che tol pert a chësta iniziativa cun mesi de trasport publichs - porchël tolan ca l'abo+.

Le Südtirol Pass abo+ é n abonamënt personal cun chël che les scolares/scolars y studëntes/studënc pó jí cun döc i mesi de trasport publichs de Südtirol. Le dërt a chësc documënt á döc i mituns dai 6 agn insö y i jogn che tl ann de domanda por le abonamënt ne ais nia ciamó complí i 27 agn.