Dan da 50.000 agn êra la tana dla laurs: dal 9 de lugio inant, vigni secunda jöbia, gnarál organisé dal Ofize Natöra, en colauraziun cun le Museum Ladin, na vijita menada al ander de Conturines. Por tó pert al’escurjiun él da se scrí ite.

Vigni secunda jöbia, dal 9 de lugio al 17 de setëmber, organisëia le Museum Ladin, en colauraziun cun l’Ofize Natöra dla provinzia autonoma de Balsan, n’escurjiun menada de set ores al ander de Conturines. L’ander é 200 metri lunch y se ciafa a 2.2750 metri sura le livel dl mer. Danter i stalatic y stalagmic che é da odëi tl ander él tl 1987 gnü descurí na sort de laurs di andri a chëra che al ti é spó gnü metü l’inom Ursus ladinicus.

An pëia ia dales 8.30 ite ala Capanna Alpina (1.726m), a San Ciascian. Da chiló jarán inant cun le acompagnadú Alfred Erardi do le tru numer 11 cina Col de Locia (2.069m) y spo devers de Gran Fanes. La jita vá inant sön n tru nia amarscé, tres barantli y giaruns ërc ia cina le ander de Conturines (2.750m). Do la vijita al ander, vëgnon derevers do le medemo tru. An röia zoruch incër les 16.

Tl ander adorun val’ de cialt da se vistí ite (temperatöres incër 1°C) y na löm da frunt; por i giaruns consiunse mazes da jí sö por munt. Le tru da fá é ri y le dislivel che an fej é de 1.100m sö pert y 1.100 jö pert. Cost: 7 euro. Iscriziuns y informaziuns pro vigni associaziun turistica dla Val Badia.